Өнгөрсөн долоо хоногт Францын дагуул хотод 17 настай хүү машин жолоодож явах үедээ зөрчил гаргаж, цагдаагийн алба хаагчийн шаардлагыг биелүүлээгүйн улмаас цагдаа түүнийг буудаж, хүү газар дээрээ нас барсан хэрэг гарсан. Энэ хэргийн дараахан нутгийн оршин суугчид эсэргүүцлийн жагсаал зохион байгуулж, цагдаагийнханд шаардлага тавьж эхэлсэн нь тэр дороо л эмх замбараагүй байдал болон хувирсан юм. Үймээн зөвхөн хэрэг болсон газарт төдийгүй Парисын бусад дагуул хотуудад ч болж, ихээхэн хохирол учруулжээ. 

Сүүлийн үеийн мэдээллээр, зургаа хоног үргэлжилсэн үймээн намжих шинжтэй байгаа гэнэ. Францад үймээнийг намжаах зорилгоор 45 мянган цагдаа дайчлагдаж, баривчилгаа үргэлжилсээр байгаа аж. Энэ зуур хотуудын эрх баригчид олныг хамарсан үймээний улмаас учирсан хохирлыг тооцоолж эхэлсэн талаар МИР 24 суваг мэдээлжээ. 

Эх сурвалжийн мэдээлснээр, Францын цагдаагийнхан үймээнийг нэг мөр дарж чадахгүй байгаа гэнэ. Энэ улсын хэд хэдэн хотод хуягт техник оруулжээ.

Зургаан өдөр, зургаан шөнө үргэлжилсэн үймээн Францад асар их хохирол учруулсан бөгөөд зөвхөн Марсельд гэхэд л хохирлын хэмжээ 100 сая евро давсан байна.

Францын бүхий л томоохон хотуудад үймээн үргэлжилж байгаа, эдгээр хотуудын хохирлыг тооцвол асар их мөнгөн дүн гарах нь тодорхой юм.

Франс Пресс агентлагийн мэдээлснээр, үймээн дэгдээгчид 3000 гаруй машин шатааж, 250 гаруй банкны салбарыг тоножээ. Түүнчлэн 250 худалдааны төв, хүнсний дэлгүүр, агуулахыг тоносон бол захиргааны 74 барилгыг шатаасны дунд 10 гаруй цагдаагийн хэлтэс багтаж байгаа аж. Гэхдээ энэ нь эцсийн тоо биш гэдгийг эх сурвалж онцолсон байна. Бизнес эрхлэгчдийн холбооноос гаргасан мэдэгдэлд үймээний улмаас учирсан хохирол нэг тэрбум евро давсан хэмээн онцолжээ. 

Хотуудыг сэргээн босгоход олон сарын хугацаа шаардлагатай гэж эрх баригчид мэдэгджээ. Харин үймээний үеэр хохирсон бизнес эрхлэгчдэд мөнгөн тусламж үзүүлэхийн дээр түр хугацаанд татвараас чөлөөлнө гэж амласан байна.

Энэ зуур Францын хотуудад баривчилгаа үргэлжилж байгаа бөгөөд саатуулагдсан хүмүүсийн дундаж нас 17 , түүнээс ч бага насныхан байгаа гэнэ. Үймээн дэгдсэний улмаас сургуулиудын хичээлийг зогсоосон тул өсвөр насныхан гудамжны эсэргүүцэлд олноор оролцож байгаа аж. Улмаар Францын эрх баригчид хүүхдүүддээ анхаарал тавьж, үймээнд оролцуулахгүй байхыг эцэг эхчүүдэд уриалсны дээр хүүхдүүд нь эмх замбараагүй байдалд оролцсон эцэг эхчүүдэд хорих ял, 30 мянган еврогийн торгуулийн шийтгэл онооно гэж Францын Хуульзүйн сайд сануулсан байна. 

Нөхцөл байдал хүндэрсэн тул гадаадын жуулчид Парист захиалсан зочид буудлын өрөөнүүдээ олноор цуцлаж байгаа гэнэ. Парисын Аялал жуулчлалын товчооны мэдээлснээр, Францад дэгдсэн үймээний улмаас Парисын буудлуудын захиалгын 25 хувь цуцлагджээ. Энэ бүхэн нь ирэх жил Олимп зохион байгуулах  Францын нийслэлийн имижэд сөргөөр нөлөөлнө гэж шинжээчид санаа зовниж байгаа аж.