Кенийн цай үйлдвэрлэгчид ширүүн эсэргүүцэлтэй нүүр тулгарч, гар аргаар цай хураадаг байдлыг механикжуулахын тулд авсан шинэ машинуудаа байнга сүйтгүүлж байгаа гэнэ. Компаниуд зардлаа бууруулахын тулд ургац хураалтдаа машин ашиглах болсноор цайны ургамал хурааж амин зуулгаа залгуулдаг ажилчдад хүнд цохилт болж, улмаар цай хураагчид машин техникийг эвдэх болсон талаар Америкийн Semafor сонин мэдээлжээ. 

Эх сурвалжийн мэдээлснээр, сүүлийн нэг жилийн хугацаанд цайны ургамал хураах 10 машиныг шатаасан хэрэг Кенизд гарчээ. Харин саяхан болсон эсэргүүцлийн улмаар нэг эсэргүүцэгч амиа алдаж, цагдаагийн алба хаагчид болон фермийн ажилчид нийлсэн 30 орчим хүн гэмтэж бэртсэн байна. Тавдугаар сард эсэргүүцэгчид алдарт Lipyon цай үйлдвэрлэгч Epaterra компанийн есөн машиныг эвдлэн сүйтгэсний улмаас 1,2 сая долларын хохирол учирсан гэж Кенийн Цай үйлдвэрлэгчдийн холбоо мэдэгджээ. 

Үүссэн асуудлыг шийдэхийн тулд Засгийн газрын тусгай ажлын хэсэг байгуулагдаж, цай үйлдвэрлэгч компаниудад механикжуулсан болон гар аргаар цай хураах ажлын харьцаа 60:40 байлгахыг зөвлөсөн байна. Түүнчлэн цай хураах машин импортлохыг хязгаарлах хууль батлахаар төлөвлөж байгаа гэнэ. Энэ ажлын хэсгийн гишүүн, Кенийн цай үйлдвэрлэгчдийн холбооны тэргүүн асан Никоалс Кируигийн мэдэгдсэнээр, ургац хураалтыг механикжуулснаар сүүлийн 10 жилийн хугацаанд 30 мянган ажлын байр үгүй болжээ.

Г.Бямбасүрэн