Сүүлийн жилүүдэд БНХАУ юанийн нөлөөллийг өргөжүүлэх, бусад орнуудтай хийх худалдаандаа доллараар тооцоо хийхээс татгалзах зорилгоор түнш орнуудтайгаа үндэсний валют, юаниар тооцоо хийх гэрээ хэлэлцээрийг хийсээр байгаа юм. 

Энэ удаад Аргентин улс Хятадаас авсан импортын бүтээгдэхүүний тооцоог юаниар хийхээр болжээ. Энэ нь долларын гадагш чиглэсэн урсгалыг сааруулахд чиглэгдсэн гэж Аргентины Эдийн засгийн сайд Серхио Масса Хятадын Элчин сайд Жоу Сяолитэй уулзсаныхаа дараа мэдэгдсэнийг NBC дамжуулсан байна. 

Ийнхүү Аргентин Хятадаас бүтээгдэхүүн худалдан авахдаа юаниар тооцоо хийхээр шийдэж, энэ сард гэхэд л нэг тэрбум ам.доллартай тэнцэх хэмжээний мөнгийг Хятадын валютаар төлөхөөр болжээ. Цаашлаад сар бүр 790 сая юанийг импортод зарцуулах юм байна. 

Аргентин улс олон улсын нөөцөө бэхжүүлэх зорилгоор 2022 оны 11 дүгээр сард Хятадтай хийсэн валютын свопоо таван тэрбум доллараар нэмэгдүүлсэн юм. 

Г.Бямбасүрэн