Италийн далайн эрэг орчмын Портофино хотын эрх баригчид нэгэн хачирхалтай шийдвэр  гаргажээ. Энд жуулчдыг селфи хийхийг хориглохоор болсон талаар МИР24 мэдээлсэн байна. 

Ердөө 500 хүн амьдардаг Портофино хотод зун бүр жуулчид олноор ирдэг аж. Хотын орчныг тольдон харуулдаг талбай, газруудад хүмүүс хэт олноор цуглардаг тул шинэ журам гаргахаар шийджээ. Аль нэг талбай дээр жуулчин селфи хийх гэж хэт удвал түүнийг торгож болзошгүй бөгөөд торгууль 275 евро хүртэл хэмжээтэй байх гэнэ. 

Аяллын улирлын үед "явган хүмүүсийн түгжрэл" үүсдэг тул ийм шийдвэр гаргахаас аргагүй болсон гэж нутгийн эрх баригчид мэдэгдсэн байна. Гэрэл зураг авахын тулд удаан саатаж, гудамжуудыг хааж байгаа жуулчид хариуцлага хүлээх ёстой гэж хотын дарга мэдэгджээ.  Энэ шийдвэрийн дагуу зуны туршид өглөөнөөс үдшийн 18,00 цаг хүртэл хориг үйлчлэх юм байна.

Г.Бямбасүрэн