Гурван жилийн хугацаанд аялах дэлхийн анхны аяллын хөлөг онгоц энэ оны 11 дүгээр сарын нэгний өдөр Стамбулаас хөдлөх юм. Энэ онгоцны тасалбарыг олон хүн авсан бөгөөд тэдний дундаас нэгэн сонирхолтой аялагчийн талаар The Mirror сонин мэдээлжээ. 

Тодруулбал, Америкийн иргэн, залуудаа онгоцны үйлчлэгчээр ажиллаж байгаад тэтгэвэртээ гарсан Мередит Шей аяллын хөлөгт тасалбар авахын тулд байшингаа зарсан гэнэ. Тасалбарыг ямар үнээр худалдан авсан нь тодорхойгүй. Мередит хөлөг онгоцны долдугаар давхарт том өрөөний тасалбар авсан гэж сэтгүүлчдэд ярьжээ. Энэ онгоцоор гурван жил аялах хамгийн хямд тасалбар нь 89 997 доллар  аж. Мередит 22 жил онгоцны үйлчлэгчээр ажиллахдаа Бутан, Монгол зэрэг олон оронд аялж байжээ.

Мередитийн аялах MV Gemini аяллын хөлөг онгоц нь дэлхийн бүх тив, тэр дундаа Антарктидаар ч орж, 135 орны 376 боомтод очих аж. Мөн тэнгисийн эрэг орчмын 208 хотод удаан зогсож, хоноглохоор ч төлөвлөсөн байна. Ингээд гурван жилийн дотор 130  мянган тэнгисийн миль замыг туулах гэнэ.

Хөлөг онгоцны мянга гаруй зорчигч  Бразилийн Христийн хөшөнөөс эхлээд Гизагийн цац суварга, Хятадын цагаан хэрэм, Таж Махал зэрэг дэлхийн хосгүй дурсгалт газруудыг үзэх юм байна.

Жуулчид аяллын үеэр амраад зогсохгүй алсын зайнаас ажиллах бүрэн боломжтой гэнэ. Алсын зайнаас ажиллах хүмүүст зориулж хурлын танхимтай бизнес төв, 14 офис, номын сан, кофены газар зэргийг тохижуулжээ. Мөн Илон Маскийн Старлинк компанийн өдөр хурдны хиймэл дагуулын интернетийн ачаар онгоцны аль ч хэсгээс өндөр хурдны интернетэд холбогдох боломжтой аж. Түүнчлэн онгоцон дээр 24 цагаар ажиллах эмнэлэг ажиллах бөгөөд эдгээр үйлчилгээг нэмэлт төлбөргүй авах юм байна.

Г.Бямбасүрэн