Өнөөдрийн сонсгол Экспортыг дэмжих, импортыг орлох үйлдвэрлэлийн 888 төслүүдтэй холбоотой асуудлаар үргэлжилж байна. 

Дээрх зээлийн асуудлуудтай холбоотой УИХ-ын гишүүн О.Цогтгэрэл ГЭРЧЭЭР оролцож байгаа юм. О.Цогтгэрэл нь Экспортыг дэмжих, импортыг орлох үйлдвэрлэлийн 888 төслийн хүрээнд тухайн үеийн Ерөнхий сайдын захирамжаар байгуулагдсан ажлын хэсгийн дэд даргаар ажиллаж байжээ. 

Иймээс түүнийг гэрчээр дуудсан юм. Мөн анхаарал татаж байгаа зүйл нь Агь буюу Грийн индастри ХХК нь гоймон үйлдвэрийн төсөл хэрэгжүүлэхээр ДӨРВӨН тэрбум 100 сая төгрөгийн зээл авсан. Зээл авсан уг  компанийн хувьцаа эзэмшигч  О.Цогтгэрэл байсан гэх баримтууд зээлийн хувийн хэрэгт хавсрагдсан байгаа аж. Түүнчлэн хамаарал бүхий Милко ХХК 2014 онд ХАА, хөнгөн үйлдвэрийн ноос ноолуур, сүү, хүлэмж, болон оёдлын салбарын төслөөр 750 сая төгрөг, Тесо компани нь 2013 онд ТАВАН тэрбум, 2014 онд ХОЁР тэрбум төгрөгийн зээл авсан. 

Тэгвэл УИХ-ын гишүүн О.Цогтгэрэл "Би 10 жилийн өмнө Ерөнхий сайдын зөвлөхөөр ажиллаж байсан. Өнөөдөр ямар асуудлаар дуудагдсан гэдгээ мэдэхгүй байна. Тухайн үед ажлын хэсгийн дэд даргаар ажиллаж байсан гэдгээ сая харж л саналаа. Ажлын хэсгээс санал гаргаад арилжааны банк руу явуулсан гэж санаж байна. Арилжааны банк өөрсдийн шаардлагын дагуу олгож байсан байхаа. Надтай хамаарал бүхий компаниудын нэр байна. Зээлийн гэрээг харсан. Банктай шууд гэрээ хийсэн. Арилжааны банк Төрийн өмнө үүрэг хүлээж байсан. Хөгжлийн банктай ямар нэг харилцаанд орж байгаа гэсэн үг." гэсэн мэдээлэл өглөө. 

О.Цогтгэрэл гишүүн танд сануулахад, энэ зээл бол ХӨНГӨЛӨЛТТЭЙ зээл. Тухайн үед АРИЛЖААНЫ зээл 19,5 хувийн хүүтэй байсан. Хоёр дахин бага буюу Хөгжлийн банкнаас 5 хувиар гараад арилжааны банкууд маржийн ашиг дөрвөн хувийн  ашиг хийгээд ЕСӨН хувиар зээлдүүлж байсан.