Telegram сувгуудаар Украины олзлогдсон цэргийг орос цэргүүд буудан хөнөөж байгаа бичлэг тархжээ. Тухайлбал, хоёр сая дагагчтай "Труха" суваг энэ бичлэгийг нийтлэсэн байна.

Энэ бичлэг бодит эсэхийг нотлох хөндлөнгийн баримт байхгүй түүнчлэн дүрс бичлэг дээр гарч буй хүн хэн болох нь одоогоор тодорхойгүй байгаа аж. Бичлэг дээр зэвсэггүй эр нуувчны хажууд зогсон тамхи татах бөгөөд "Украин мандтугай" гэж хэлснийх нь дараа түүнийг автоматаар шүршин хөнөөж байгаа нь дүрслэгджээ. 

Энэ бичлэг гуравдугаар сарын зургааны өдөр цахим сувгуудаар тархсан юм. Бичлэг дээр "түүний зургийг ав" гэж хэн нэгэн хэлэхэд камер түүнийг чиглэх аж. Олзны цэрэг "Украин мандтугай" гэж хэлсний дараа түүнийг буудаж, харин бичлэгний цаана гарах яриа орос хэлээр, мөн хараалын үгс урсгаж байгаа юм.

Бичлэг тархсны дараа Украины албаныхан байр сууриа илэрхийлжээ. 

"Олзны хүнийг хөнөөсөн нь оросуудын ээлжит цэргийн гэмт хэрэг. Энэ нь "нацистууд"-ын тухай худал яриагаар Кремийн суртал ухуулгад автсан алан хядагчийн зориудын үйлдэл. Ийм гэмт хэрэг бүр төлөөсөө төлнө. Хэн ч нуугдаж чадахгүй. Бүгдийг олно" хэмээн Украины Ерөнхийлөгчийн захиргааны тэргүүн Андрей Ермак Твиттер хуудсандаа бичжээ. 

Украины өөр нэг албан тушаалтан энэ хэргийг Женевийн конвенци зөрчсөн хэрэг гэж мэдэгдлээ. 

"Энэ дүрс бичлэгийг олон улсын түншүүд болон бусад орны салбар нэгтнүүддээ Оросын ээлжит цэргийн гэми хэргийн баталгаа болгон илгээсэн" хэмээн Украины Хүний эрхийн асуудал хариуцсан түшмэл Дмитрий Лубинец мэдэгдээд олзны хүнийг хөнөөх нь Женевийн конвенци зөрсөн хэрэг гэж онцолсон байна. 

Украины Авулгүй байдлын албаны Мөрдөн шалгах ерөнхий газар дээрх бичлэгтэй холбоотойгоор Украины Эрүүгийн хуулийн 438 дугаар зүйлийн 2 дахь хэсэгт заасны дагуу (дайны үеийн хууль) эрүүгийн хэрэг үүсгэсэн гэж Украины Ерөнхий прокурор Андрей Костин мэдэгджээ.

"Дайнд ч хууль бий. Олон улсын эрхзүйн зүйл заалт гэж бий, харин Оросын дэглэм үүнийг үл хайхарч байна. Гэвч гэмт хэрэг эрт орой хэзээ нэгэн цагт шийтгэл хүлээдэг. Хамааралтай бүх этгээдүүд хуулийн өмнө хариуцлага хүлээнэ" хэмээн Андрей Костин мэдэгдсэнийг "Интерфакс" дамжуулжээ.

Харин Украины Гадаад хэргийн сайд Дмитрий Кулеба олзны цэргийг хөнөөсөн хэргийг Олон улсын эрүүгийн шүүх шалгах ёстой хэмээн мэдэгдсэн байна.

"Украин мандтугай" гэсэн үгсээс л болж Оросын цэргүүдэд цаазлагдсан, зэвсэггүй украин олзны цэргийг харуулсан аймшигт бичлэг харлаа. Энэ нь өнөөгийн дайн үй олноор хөнөөж буй хэрэг гэдгийг дахин нэг баталгаа юм. Энэхүү аймшигт цэргийн гэмт хэргийг Олон улсын эрүүгийн шүүхийн прокуророр Карим Хан нэн даруй шалгах ёстой. Гэм буруутай этгээдүүд шүүхийн өмнө зогсох ёстой" гэж Дмитрий Кулеба Твиттер хуудсандаа бичжээ.

Украины албаны этгээдүүд олзны цэргийг хөнөөж байгаа бичлэгтэй холбоотойгоор ийнхүү байр сууриа илэрхийлсэн бол Оросын тал одоогоор ямар нэг тайлбар өгөөгүй байна.

Энд дуулгахад, олзны цэргүүдийг хөнөөж буй бичлэг гарч байгаа анхны тохиолдол нь энэ биш юм. Өмнө нь, украинчууд ч орос олзны цэргүүдийг хөнөөсөн явдал гарч байлаа. Тодруулбал 2022 оны 11 дүгээр сард Луганск мужид Оросын гурван цэргийг хөнөөж буй дүрс бичлэг цацагдсан. Энэ явдлыг Оросын Батлан хамгаалах яам буруушааж, Украины эрх баригчид болсон хэргийг мөрдөн шалгана хэмээн амлаж байв.

Г.Бямбасүрэн