Гуравдугаар сарын хоёрны өдөр, Украины хилтэй залгаа Оросын Брянск мужид Украины хорлон сүйтгэгчид нэвтэрч, улмаар мөргөлдөөн гарсан талаар Оросын хэвлэлүүд мэдээлжээ. "Хорлон сүйтгэх" ажиллагааны үеэр орон нутгийн иргэдийн дунд амиа алдсан, шархадсан хүмүүс гарсан хэмээн ТАСС мэдээлсэн байна.

Эх сурвалжийн мэдээлснээр, Любечане, Сушаны гэсэн хоёр суурин руу хорлон сүйтгэгчдийн бүлэг нэвтэрсэн аж. Оросын гвардынхан эдгээр хорлон сүйтгэгчидтэй тулалдсан, болсон үйл явдлыг Оросын Ерөнхийлөгч алан хядах ажиллагаа хэмээн нэрлэсэн талаар Оросын хэвлэлүүд мэдээлжээ. Энэ үйл явдлын ард хэн байв?

"Оросын сайн дурын корпус"

2022 оны наймдугаар сараас эхлэн Украины талд байлдаж байгаа, Оросын сайн дурынхны бүлэг болох "Оросын сайн дурын корпус" гуравдугаар сарын хоёрны өдөр Брянск мужийн нутаг болсон үйл явдлын хариуцлагыг өөр дээрээ авчээ. 

"Яг одоо цахим ертөнцөөр та бүхэн хүүхдүүдийг хөнөөж, хүмүүсийг барьцаалаад цааш яаран одсон "Украины хорлон сүйтгэгчдийн бүлэг"-ийн талаарх мэдээллийг харж болно. Гэвч энэ бүхэн Кремлийн суртал ухуулагчдын худал хуурмаг мэдээ. Зэвсэг барьсан чөлөөт орос хүмүүс өнөөгийн дэглэмтэй тэмцэх найдвар бий гэж нутаг нэгтнүүддээ харуулахын тулд Оросын сайн дурын корпус Брянск мужид ирсэн" хэмээн "Оросын сайн дурын корпус"-ийн Телеграм хуудсан дахь мэдэгдэлд өгүүлжээ. 

Үүнээс өмнө энэ корпусийнхан "Любечаны хүүхэд, эх барих эмнэлэг" гэсэн хаягтай барилгын өмнө зогсон хийсэн дүрс бичлэгийг түгээж байв.

"Бид энгийн иргэдтэй байлдахгүй, зэвсэггүй хүмүүсийг хөнөөхгүй. Бид боолууд биш гэдгийг Оросын энгийн иргэд ойлгох цаг нь ирсэн. Босцгоо, тулалдацгаа" хэмээн нэгэн дайчин өгүүлж байлаа. 

Оросын хэвлэлүүдийн зөрүүтэй мэдээллүүд

Оросын сайн дурын корпусийнхан болсон үйл явдлын хариуцлагыг өөр дээрээ авахаас өмнө Оросын хэвлэлүүд болон эрх баригчдын талыг баримталдаг Телеграм сувгууд Брянск мужийн нутагт "Украины хорлон сүйтгэх, тагнуулын бүлгүүд" халдсан гэсэн мэдээллийг түгээж байв. 

Тухайлбал, Оросын төрийн хэвлэл болох ТАСС агентлагийн мэдээлэлд "Любечане болон Сушаны суурингуудад Украины хорлон сүйтгэгчидтэй тулалдсан", хорлон сүйтгэгчид сургуулийн автобус руу буудаж, хүмүүс барьцаалж, цахилгаан станц, хийн станцуудыг дэлбэлж, хүмүүсийг хөнөөж, шархадуулсан хэмээн онцолсон байлаа. Харин удалгүй энэ мэдээллийг орон нутгийн эрх баригчид няцаасан юм. 

Путин: Энэ бол алан хядах ажиллагаа

Брянск мужид болсон энэ үйл явдлыг Оросын Ерөнхийлөгч Владимир Путин "алан хядах ажиллагаа" хэмээн нэрлэсэн юм. 

"Хилийн бүсийн нутаг руу нэвтэрч, иргэд рүү гал нээсэн. Энгийн хүмүүсийн машин гэдгийг харцгаасан, тэнд энгийн иргэд, хүүхдүүд байгааг ч харцгаасан ч гал нээсэн" хэмээн Путин мэдэгдээд энэ үйл явдал нь "ээлжит алан хядах ажиллагаа, ээлжит гэмт хэрэг" гэж онцолсон байна. 

Украины талын байр суурь

Оросын хэвлэлүүд "Украины хорлон сүйтгэгчид" үйлдсэн гэж мэдээлсний дараа Украины тал үүнийг мэдээллийн өдөөн хатгалга хэмээн нэрлэсэн юм.

"ОХУ-д Украины хорлон сүйтгэх, тагнуулын бүлэг нэвтэрсэн гэх мэдээлэл нь өнөөх л байдаг өдөөн хатгалаг. Зориудаар ийм мэдээлэл тарааж байгаа юм. Өөр улс орон руу халдаж байгаага зөвтгөхийн тулд, өөрсдийнхнийгөө айлгахын тулд Орос ийм алхам хийж байна" хэмээн Украины Ерөнхийлөгчийн захиргааны тэргүүний зөвлөх Михаил Подоляк Твиттер хуудсандаа бичжээ.

Түүний үзэж байгаагаар, ОХУ-д партизаны хөдөлгөөн улам хүчтэй, түрэмгий болж байгаа гэнэ. Тиймээс "өөрсдийн партизанаас айж яв" хэмээн Подоляк оросуудад хандан өгүүлжээ.

Харин Украины Батлан хамгаалах яамны Тагнуулын Ерөнхий газрын төлөөлөгч Андрей Юсов Брянск мужид болсон үйл явдал нь "Орост өөрчлөлт, Путиний дэглэмээс чөлөөлөгдөх үйл явц үргэлжилж байгаагийн илрэл" хэмээн онцолсон байна.

"ОХУ-д үндэстэн, угсаатан, шашин хоорондын, нийгэм улс төрийн болон бусад зөрчлүүд асар их байдаг улс орон. Өнөөдөр Оросын сайн дурын корпус олон нийтэд хандан мэдэгдэл хийж байна. Энэ хүмүүс бол Путиний эсрэг болон түүнийг дэмждэг хүмүүсийн эсрэг гартаа зэвсэг барин тэмцэж буй хүмүүс. Оросууд сэрж, ямар нэг арга хэмжээ авах ёстой гэж ухамсарлаж эхлэж байж магадгүй" хэмээн Юсов "Громадське" телевизэд өгсөн ярилцлагадаа онцолжээ. 

Г.Бямбасүрэн