Даваа гарагт Турк, Сирид хүчтэй газар хөдлөлт хоёронтаа болж, энэ газар хөдлөлтийн улмаас хөрш орнуудад нийтдээ 4300 гаруй хүн амиа алдаад байна. Эрэн хайх, аврах багийнхан бүхэл шөнийн турш ажилласан бөгөөд олон улсын аврагчид ч тэдэн дээр хүч нэмэхээр дэлхийн өнцөг булан бүрээс очиж байгаа юм.

Аврах ажиллагаа тасралтгүй үргэлжилж байгаагийн ачаар нуранган дороос амьд үлдсэн хүмүүсийг цаг алдалгүй олсоор байгаа талаар RT мэдээлжээ. RT телевизийн мэдээлснээр, газар хөдлөлт болсноос хойш бүтэн нэг хоногийн дараа буюу хоёрдугаар сарын долооны өглөө байшингийн нуранган доороос 14 настай хүүг эсэн мэнд гарган авчээ. Хүүг Жан гэх бөгөөд түүний амь насанд аюул учрахуйц гэмтэл бэртэл байхгүй гэж эмч нар мэдээлсэн байна.

Даваа гарагт болсон газар хөдлөлтийн улмаас Турк, Сирид нийтдээ 4310 хүн амиа алдсан бөгөөд хохирогчдын тоо цаашид ч нэмэгдэх төлөвтэй байгаа аж. 1939 оноос хойш тохиосон хамгийн том гамшигт тооцогдож буй энэ газар хөдлөлтийн дараа Туркийн Ерөнхийлөгч Режеп Тайип Эрдоган долоо хоногийн хугацаатай үндэсний гашуудал үарласан юм. 

Г.Бямбасүрэн