Газар нутгаа хамгаалан Оростой дайтаж буй Украинд барууны орнууд зэвсгийн тусламж үзүүлсээр байгаа юм. Энэ удаад Их Британи Украин руу Challenger танк 12-ыг илгээхээр болсон талаарх мэдээлэл гарсан. Харин ийм хэмжээний танк төдийлөн нэмэр болохгүй гэж Британийн генерал мэдэгджээ. 

Challenger танкийг 50 -иас бага тоогоор Украин руу илгээх нь дайны явцад Украин нөхцөл байдлыг өөрийн талд ашигтайгаар эргүүлэхэд нөлөөлөхгүй гэж Британийн Ерөнхий штабын дарга асан генерал Ричард Данат мэдэгдсэн байна. 

"Украин руу 12 танк өгнө гэнэ, энэ бол бэлгэдлийн л чанартай болно. Би үүний оронд 25, 30 эсвэл бүр 50 танк явуулахыг санал болгох байсан, тэгэж байж л бодитой үр ашиг гарна" хэмээн Даннат Скай Ньюс агентлагт өгсөн ярилцлагадаа онцолжээ.

Их Британи Украинд 12 танк өгөхөөр болсон талаарх мэдээлэл энэ сарын 11-ний өдөр Financial Times сонин дээр гарсан юм. Эх сурвалжийн мэдээлснээр, Украины тал 300 танк нийлүүлэхийг хүссэн гэнэ. Гэвч эхний ээлжинд Challenger танкнаас 12-ыг илгээхээр болжээ. Ийнхүү эдгээр танкийг нийлүүлвэл Их Британи улс Украинд баруунд үйлдвэрлэсэн хүнд танк нийлүүлж байгаа анхны улс болох юм. 

Г.Бямбасүрэн