Оростой сөргөлдөх явцад Баруун орнууд Украинд үзүүлэх дэмжлэгээ урт хугацаагаар төлөвлөх шаардлагатай болсон гэж НАТО-ын Ерөнхий нарийн бичгийн дарга Йенс Столтенберг ВВС агентлагт өгсөн ярилцлагадаа онцолжээ. 

"Орос улс Украинд хяналтаа тогтоох гэсэн гол зорилгоосоо татгалзах хүсэлгүй байгааг бид харлаа. Тиймээс бид урт удаан замд бэлэн байх ёстой" хэмээн Столтенберг онцолжээ.

Түүний өгүүлснээр, Украины арми амжилт гаргаж байгаа ч Киев тун удахгүй ялчихна гэж төөрөлдөн бодох хэрэггүй гэнэ.

"Украины цэргүүд олон сарын туршид сөрөг давшилт хийлээ. Гэхдээ Орос улс дайчилгаа явуулж, цэргийн эгнээгээ дүүргэсэн, дайчлагдсан хүмүүсийн ихэнх нь сургалтад хамрагдаж байгааг бид мэднэ. Энэ бүхнээс харахад тэд дайныг үргэлжлүүлж, шинээр давшилт хийхээр бэлдэж байна" хэмээн НАТО-ийн Ерөнхий нарийн бичгийн дарга мэдэгджээ.

Мөн өнөөгийн нөхцөлд Украин улсад Барууны цэргийн дэмжлэг нэн чухал байгааг Йенс Столтенберг цохон тэмдэглэсэн байна.

"Украин улс Европын  тусгаар, хараат бус, ардчилсан улсын хувьд ялалт байгуулж, энхийн гэрээний эхлэл тавигдаасай гэж бид хүсэж л байгаа бол Украинд дэмжлэг үзүүлэх ёстой. Тэр дундаа цэргийн дэмжлэг үзүүлэх ёстой. Учир нь цэргийн дэмжлэгээ нэмэгдүүлэх нь л Оросыг хэлэлцээрийн ширээний ард суулгаж, Украиныг тусгаар, хараат бус орон гэдгийг хүлээн зөвшөөрүүлэх цорын ганц арга" хэмээн Столтенберг онцолжээ.

Хоёр орны хооронд яриа хэлэлцээ зогсонги байдалд орсон ч эрт орой хэзээ нэгэн цагт хэлэлцээ болох нь ойлгомжтой гэж НАТО-ийн Ерөнхий нарийн бичгийн дарга Столтенберг үзэж байгаа аж. 

"Ихэнх дайн энхийн хэлэлцээгээр дуусдаг. Энэ удаагийн дайн ч тэгэж л дуусах байх. Ямар нөхцөлөөр энхийн гэрээ байгуулах вэ гэдэг нь тулааны талбар дээрх хүчний харьцаанаас бүрэн хамаарна" гэж Йенс Столтенберг мэдэгджээ. 

Өмнө нь Украины Ерөнхийлөгч мэдэгдэл хийхдээ Украин ялах хүртлээ тулалдахаас өөр сонголт байхгүй хэмээж байв. Сүүлийн үед Оросын тал Украины дэд бүтцэд өгөх цохилтуудаа эрчимжүүлж байгаа бөгөөд энэ цохилтын улмаас 12 дугаар сарын сүүл үеийн байдлаар Украины 700 дэд бүтцийн чухал объект сүйдсэн байна. Баярын өдрүүдэд ч Оросын цохилт үргэлжилж,  шинэ оны баярын үеэр Оросын цэргүүд удаа дараа цохилт өгсний улмаас энгийн хоёр иргэн амиа алдаж, 50 хүн шархаджээ.

Г.Бямбасүрэн