Хууль зүйн байнгын хороо хуралдаж байна. Хуралдаанаар Гэмт хэрэг, зөрчлөөс урьдчилан сэргийлэх тухай хуульд өөрчлөлт оруулах тухай, Шүүхийн шийдвэр гүйцэтгэх тухай хуулийг дагаж мөрдөх журмын тухай хуульд өөрчлөлт оруулах тухай хуулийн төслүүдийн анхны хэлэлцүүлгийг хийж байна.

Хэлэлцэж байгаа асуудалтай холбогдуулан УИХ-ын гишүүн Б.Энхбаяр "Хил манах хүнгүй болжээ. Хилийн цэрэг хамгийн бага цалинтай нь байна. Цаашид үүнд анхаарах шаардлагатай. Хоёрдугаарт, тэтгэвэрт гарсан хүн төрийн албанд ажиллахгүй гэдэг хуулийг цагдаа дээр хэрэглэх шаардлага байна уу? Үйлчлэхгүй гээд тодотгох боломжтой юу? Хойт хөрш цэрэг цагдаагийн өөр бодлого баримталдаг. Хэр баргийн алдаан дээр гаргачихдаггүй. Тусгай бэлтгэдэг хүмүүс учраас гэмт бүлэглэлийн гишүүн болоод явчих магадлалтай гэж үздэг. Манайх үүн дээр ямар байр суурьтай байна. Ковидын үед цагдаагаа нохойд барьдаг мод болгодог. Стресстэй иргэдтэй нүүр тулж байгаа нь замын цагдаа байна. Иргэд замын цагдаа нартай хүн гэдгээр нь хандах хэрэгтэй. Цагдаагийн дарга нь хар машинд суучихаад станцаараа татуулдагаа больмоор байна. Би өөрөө машин барьдаг учраас их анзаардаг. Бухимдал дээр бухимдал, түгжрэл дээр түгжрэл үүсгэдэг" гэлээ

Үүнд ХЗДХ-ийн сайд Х.Нямбаатар "Улсын хил дээр ажиллаж байгаа ахлагч ойролцоогоор 940 мянган төгрөгийн цалин авдаг. Үүн дээр 15 хувийн нэмэгдэл олгохоор тооцож байна. Манай салбарт Шүүх эмнэлгийн шинжээч эмч, нарийн мэргэжлийн эмч нарыг Дотоод хэргийн сургууль дээр агентлагуудын захиалгын дагуу бэлтгэдэг. Тэтгэвэрт гарсан алба хаагчдыг төрийн албанд ажиллахгүй гэдэг нь Хууль зүйн салбарт зохихгүй байгаа" гэлээ.