Монгол Улсын дотоодод коронавирусийн халдвар тархсантай холбогдуулан Гамшгаас хамгаалах бүх нийтийн бэлэн байдлын зэрэгт шилжээд байгаа. Бэлэн байдлын зэрэгт шилжсэн энэ үед батлагдаагүй замаар хязгаарлалтын дэглэм зөрчиж хот хооронд зорчвол хүнийг 500 мянган төгрөгөөр торгох эсхүл 7-30 хоног баривчлах хуулийн зохицуулалттай болохыг Тээврийн цагдаагийн албанаас анхаарууллаа. 

Халдварт өвчний үед эрх бүхий байгууллагаас тогтоосон хөдөлгөөний хязгаарлалтыг зөрчихөөс сэргийлж хот орчмын батлагдаагүй шороон замууд, гарц, гармуудыг бүрэн хааж, 24 цагийн туршид хяналт тавьж ажиллаж байгаа аж.  

Улаанбаатар хотоос гадна хөдөө, орон нутагт халдвартай бүсээс хууль бусаар хүн тээвэрлэх зөрчил гарч байна. Тухайлбал Төв аймгийн Заамар суманд сүүлийн үед халдварын голомттой бүс нутаг болох Улаанбаатар хотоос зөвшөөрөлгүй хүн тээвэрлэх цөөнгүй зөрчил гарсныг Заамар сум дахь сум дундын цагдаагийн хэлтсээс мэдээллэв. Иймд иргэд, олон нийт зөвшөөрөлгүйгээр хулгайн замаар тээвэр хийж байгаа автомашинаар зорчихгүй байх, PCR шинжилгээ өгөөгүй иргэдийг тээвэрлэхгүй байхыг жолооч болон иргэдэд анхааруулж байна.

Хэрэв энэ төрлийн зөрчил гаргавал Зөрчлийн тухай хуулийн 5.13 дугаар зүйл "Гамшгаас хамгаалах тухай хууль" зөрчсөн иргэнийг 500 мянган төгрөгөөр торгох, эсхүл 7-30 хоногийн хугацаагаар баривчлах шийтгэл оногдуулна. Түүнчлэн хулгайгаар такси үйлчилгээ үзүүлсэн иргэнд дээрх хуулиар арга хэмжээ тооцож хууль бусаар олсон хөрөнгө орлогыг хурааж, учруулсан хохиролыг нөхөн төлүүлж зөрчил үйлдэхэд ашигласан тээврийн хэрэгслийг улсын орлого болгохыг сануулж байна. 

Нийслэлийн хэмжээнд өнөөдрийн байдлаар үндсэн 8 шалган нэвтрүүлэх товчоод болон машин нэвтэрч болзошгүй байршлуудад явуулын пост ажиллаж байна. 

Б.Итгэл