Гэр хорооллыг орон сууцжуулах ажлыг зургаан дэд төвийн бүтээн байгуулалтад тулгуурлан хэрэгжүүлэхээр шийдвэрлэсэн.  Үүний нэг нь Сэлбэ дэд төвийн бүтээн байгуулалтын ажил юм. Энэ хүрээнд 158 га газрын 2000 нэгж талбар дахь айлуудын газрыг чөлөөлөхөөр төлөвлөлт гаргасан. Сэлбэ дэд төв нь Улаанбаатар хотыг хөрс, агаарын бохирдол, түгжрэлээс салгах томоохон эхлэлийн цэг байх болно гэдгийг хотын дарга Х.Нямбаатар мэдэгдсэн. 

Тэгвэл Сэлбэ дэд төвийн ажлыг эхлүүлэхээр тендер зарлажээ. Тодруулбал, Сэлбэ дэд төв" орчмын гэр хорооллыг дахин төлөвлөн орон сууцжуулах төслийн ТЭЗҮ, барилгажилтын төсөл, олон улсын зөвлөх үйлчилгээ, зураг төслийг боловсруулах ажлыг 3.8 тэрбум төгрөгөөр хийлгэхээр болсон байна. Орон сууцны бодлогын газрын захиалгаар хийгдэх ажлын санхүүжилт нь нийслэлийн төсөв байх юм. Ийнхүү хотын шинэ дарга гэр хорооллыг орон сууцжуулах төлөвлөгөөгөө хэрэгжүүлэхээр ажлаа эхлүүллээ. 

Гэхдээ үе үеийн нийслэлийн Засаг дарга нар гэр хорооллыг орон сууцжуулахаар төсөл эхлүүлж, цаасан дээр төлөвлөгөө буулгаж байв. Яг л энэ жишгээр Х.Нямбаатар дарга олон улсын зөвлөх үйлчилгээг авахаар болж байна. 

П.ГОО