Грекийн Родес хотод 55 гаруй орны 600 орчим шатарчин хүүхэд чуулж 2023 оны сурагчдын шатрын дэлхийн аваргаа тодрууллаа. Энэ удаагийн дэлхийн аваргын тэмцээнээс Монгол Улс 7 болон 11 насны ангилалд дэлхийн хоёр аваргатай болов.

Тодруулбал, 11 насны ангилалд эх орноо төлөөлөн оролцсон Б.Буянхишиг илт тасархай үзүүлэлтээр дэлхийн аваргын болзол хангасан бол долоон настай Ц.Гэрэлт-Оюу мөн л үнэмлэхүй амжилт үзүүлэн, нэг ч хожигдолгүйгээр түрүүлжээ.

Харин хөвгүүдийн 13 насны ангилалд "Босоо ноён" клубийн тамирчин Г.Тэнгүүндалай 7,5, охидын 9 насанд "Босоо ноён" клубийн тамирчин И.Цэлмүүн 8.0, 13 насанд "Мончесс" академийн тамирчин Г.Урангоо 7.5 оноогоор тус тус мөнгөн медаль, "Гэгээн Арвай" клубийн тамирчин Н.Содгэрэлт 6.5 оноогоор хүрэл медалийн эзэн боллоо.