Олон улсын чөлөөт бөхийн мэргэжлийн лиг PWL (Poddubny Wrestling League)-ийн ээлжит тэмцээн дөрөвдүгээр сарын 26-нд Казахстаны Алматы хотын “Балуан Шолак” arena-д болох гэж байна. 

Тус тэмцээнд Азербайжан, Армени, Энэтхэг, Иран, Казахстан, Куба, Кыргызстан, Молдав, Япон, ОХУ гэсэн 10 орны шилдэг тамирчид зодоглох бөгөөд гол барилдаанд олимпын хошой аварга, ОХУ-ын Роман Власов, Токио олимпын медальт, Киргизийн Акжол Махмудов хоёр өрсөлдөх болжээ.

Дөрөв дэх удаагийн “PWL”-т эмэгтэйчүүдийн 53 кг-ын жинд Токиогийн олимп, ДАШТ-ий хүрэл медальт, Монгол Улсын гавьяат тамирчин Б. Болортуяа Дагестаны анхны эмэгтэй бөх, Европын АШТ-ий хошой хүрэл медальт Милана Дадашеватай өрсөлдөхөөр болсныг мэдэгдлээ. 

Б.Болортуяа өнгөрсөн жил "PWL" анхдугаар лиг болон Яшар Догугийн нэрэмжит дэлхийн чансааны оноо олгох тэмцээний финалд түүнийг ялж түрүүлж байсан билээ.