2023 оны хаврын мэргэжлийн лиг сар гаруй хугацаанд болж, өндөрлөлөө. Энэхүү тэмцээнд "Stalwart E-Sport" баг PUBG mobile төрөлд Зүүн Азийн аварга боллоо. Энэ нь тэдний аваргалж буй тав дахь удаагийн тохиол юм.

Тодруулбал, энэ хаврын PMPL-д тус баг хоёр шинэ тоглогчтой орж ирсэн. Гэсэн хэдий ч аваргаа хамгаалж чадсан юм. Тэдний дараагаар "NBeSports" болон "4 merical vibes" багууд дэд, гутгаар байрыг эзэлсэн. Ингэснээр манай улсын гурван баг эхний гурван байрыг эзэлсэн байна. Мөн MVP тоглогчоор "Stalwart Esport" багийн "ТОР" тодорлоо.

Хүснэгтийг тэргүүлсэн эхний 12 баг дөрөвдүгээр сарын 17-ноос эхлэх Пакистан бүсийн найман багтай өрсөлдөх Өмнөд Азийн Аварга шалгаруулах тэмцээнд оролцох эрхийг авсан юм. Манай улсаас таван баг оролцохоор боллоо.

Уг тэмцээнээс аварга авсан баг Саудын Арабт долоодугаар сарын 11-16-ны өдөр болох Зуны дэлхийн аварга шалгаруулах тэмцээнд оролцох юм. Тус тэмцээнд бүс бүсийн шилдэг багууд өрсөлдөх бөгөөд шагналын сан нь гурван сая ам.доллар билээ.