Усан спортын ОУХМ, “Орчлон” сургуулийн сурагч Э.Эрхэс АНУ-ын Өмнөд бүсийн өсвөр үе, залуучуудын “2022 Tac Titan Big Southern Classic Meet” тэмцээнд амжилттай оролцож, 50 м-ын өврөөр даллах, 100 м-ын араар даллах, 100 м-ын далайн гахай сэлэлтийн төрлүүдэд 2 алт, 1 мөнгөн медаль хүртжээ.

Э.Эрхэс дээрх амжилтаараа AНУ-ын Усанд Сэлэлтийн Холбооны “Premium Athlete” буюу өндөр зэрэглэлийн тамирчны болзлыг хангаж, 2023 оны залуучуудын үндэсний аваргын тэмцээнд оролцох эрхээ авсан байна. 

АНУ-ын Хойд Каролина мужийн Кари хотноо энэ сарын 11-13-ны өдрүүдэд болсон тус тэмцээнд Техас, Флорида, Виржиниа зэрэг 17 муж улсын усан спортын шилдэг тамирчид оролцож, дараа жилийн залуучуудын үндэсний аварга болон бусад томоохон тэмцээнүүдийн эрхийн төлөө өрсөлдсөн аж.