Цахим спортын “CS:GO” төрлийн хамгийн том тэмцээн болох "Мэйжор"  Бразилын Рио де Жанейро хотод үргэлжилж байна.

1.25 сая ам.долларын шагналын сантай тус тэмцээнд бүс бүрээс шалгарсан шилдэг 24 баг өрсөлдөж байгаа бөгөөд Ази-Номхон далайн бүсийг төлөөлж Монголын “IHC Esports” баг оролцож байна.  

Тэмцээний эхний өдөр тааруу тоглож, төгсгөл муу хийсэн манай залуус өнөөдөр /2022.11.02/ хожигдох эрхгүй тоглолтод амжилттай ялалт байгууллаа. "IHC Еsport" баг “00Nation” хэмээх "Мэйжор"-ийн хоёр удаагийн аварга багийн эсрэг тоглолтыг хийсэн юм. Тус багийн бүрэлдэхүүнд “CS:GO”-ийн амьд домгууд гэж хэлж болох дэлхийн шилдэг тоглогч, “Coldzera” буюу Марсело Дэвид, мөн Мэйжорын аварга “Taco” Эпитасио де Мело тэргүүтэй тоглогчид байв. 

Энэ өдөр “IHC Esports” багаас “Blitz” Б.Гарьдмагнай гайхалтай тоглолтуудыг үзүүлсэн бол чухал үед арвин туршлагатай “kabal” буюу Б.Бат-Энх хэрэгтэй буудалтуудыг хийлээ.

Ийнхүү манай залуус нэг хожил, хоёр хожигдолтойгоор аяллаа цааш үргэлжлүүлэхээр болов.