“Янзтай” дээд лигийн финалын тоглолтууд өчигдөр эхэллээ. Тодруулбал, 17.00 цагт "Хасын хүлэгүүд" "Эрдэнэтийн Уурхайчид" багийн цувралын эхний тоглолт болов. Эхний тоглолтод 103:66 онооны харьцаатайгаар “Хасын хүлэгүүд” баг илт давуу байдлаар хожил байгууллаа. Ингэснээр цувралыг 1:0 болж Хасын хүлэгүүд баг тэргүүлж эхэлсэн байна.

Тэгвэл өчигдөр болсон финалын тоглолтод сагсан бөмбөг сонирхогчид шүүмжлэлтэй хандаж байгаа юм. Учир нь “Хасын хүлэгүүд” баг хагас шигшээ шатны тоглолтод “Архангай Алтан Дорнодын Дайчид” багтай зургаан тоглолт гаргаж, аваргын төлөө тоглох эрхтэй болсон бол “Эрдэнэтийн Уурхайчид” баг “Тэнүүн Өлзий Металл” багтай хагас шигшээд долоон тоглолт хийж, маш хүнд цувралд ялалт байгуулсан. Ингэснээр тэд аваргын төлөө тоглох эрхтэй болсон юм. “Эрдэнэтийн Уурхайчид” “Тэнүүн Өлзий Металл” багийн цувралын долоо дахь тоглолт энэ сарын 13-нд болж, тэд нэг өдрийн амралттайгаар финалын тоглолтыг эхлүүлсэн.

Тиймээс ч өчигдөр болсон финалын эхний тоглолтод олон онооны зөрүү үүсэж, хожигдсон гэж сагсан бөмбөг сонирхогчид дүгнэж байгаа юм. Тодруулбал,

“Тамирчдыг амраах хэрэгтэй. Цувралын дараагийн тоглолтыг 2-3 хоног хойшлуулах шаардлагатай. Тамирчдаа хайрла. Эрдэнэтийн Уурхайчид баг хагас шигшээд долоон тоглолт хийж гарч ирсэн. Тэд ядарч байна. Дараагийн тоглолтыг хойшлуулах хэрэгтэй. Хагас шигшээ тоглолтын дараа 46 цагийн амралттай тамирчид сайн тоглохгүй нь тодорхой. Ядарч байгаа. Амралт хэрэгтэй. Хэн ч долоон тоглолтын дараа сайн амрахгүйгээр финалд сайн тоглож чадахгүй” гэж сагсан бөмбөг сонирхогч, үзэгчид олон нийтийн цахим сүлжээнд санал бодлоо илэрхийлсээр байна.

Хэдийгээр энэ жилийн дээд лигийн тоглолтууд нэг өдрийн амралттай, шахуу хуваарьтай үргэлжилж байгаа ч финалын тоглолтын өмнө тамирчдад амралт хэрэгтэй. Хоёр багийн энэ тэнцүү өрсөлдөөн, сонирхолтой тоглолтуудыг үзэхийг сагсан бөмбөг сонирхогчид үзэхийг хүсч байна.

Мөн финалын тоглолт үзэх гэсэн иргэд тоглолт эхлэхээс хоёр цагийн өмнө Спортын төв ордны өмнө дугаарлаж, азтай нь орж, азгүй нь хаалганаас буцаж байна. Өөрөөр хэлбэл, зохион байгуулалт шаардлагатай байна. 

Финалын тоглолтын тасалбарын үнэ 10.000 төгрөг, V.I.P суудлын тасалбар 30.000 төгрөгөөр тус тус худалдаалагдаж байна.

М.Насан