Олон улсын эмэгтэйчүүдийн эрхийг хамгаалах энэ өдөр  Сүхбаатарын талбайд худалдааны салбарын эмэгтэйчүүд хагас нүцгэнээр эсэргүүцлийн цуглаан хийлээ. Тэд өнөөдөр баярлах шалтгаангүй байгаагаа хэлж байна. Эмэгтэйчүүд “Эрх мэдэлтнүүд 0 хувийн хүүгээр мөнгө хүүлдэг. Тэрийг нь худалдаа, үйлчилгээний салбарынхан 120 хувийн хүүтэйгээр зээлж, өрөнд дарлуулж байна. Өдрийн зээлэнд дарлуулж, амиа хорлож, гэр бүл салж, хүүхэд өнчирч байна. Ээжүүд хүчирхийлэлд өртөж байна. Үр хүүхэд минь өлсөж байна. Бидэнд ядрах, өвдөх эрх алга. Шударга нийгэмд хүн шиг амьдармаар байна” хэмээн шударга ёсыг шаардаж байна.

Худалдаачдын холбоо ТББ-ын төлөөлөл “Хөгжлийн банк, 10 их наяд, ЖДҮ зэрэг бага хүүтэй зээлийг ББСБ-аар дамжуулж, мөнгө хүүлж байна. Худалдаа эрхлэгчид, үйлчилгээний салбарынхан жилийн 120-360 хувийн хүүтэй өдрийн зээлэнд дарлуулж байна. Бид өнөөдөр өргөж яваа ачаа шигээ хүндийг үүрч амьдарч байна. Худалдаа үйлчилгээний салбарыг төр 32 жил хаясан, бид өнчин хүүхдүүд шиг амьдарч байна. Бидэнд хууль хэрэгтэй байна. Худалдаачдыг дэмжих сан хэрэгтэй. Татвар, түрээс, торгууль зэргээр төр авахаа л мэддэг. Өгөхөө мэддэггүй. Бид баян хүмүүсийн мөнгийг өсгөж өгдөг машин болсон. Монголын нийгэм сайхан байсан бол бид ч баярламаар байна. Бид мөлхдөг байсан бол одоо элгээрээ хэвтэж байна” хэмээн гомдол илэрхийлж байна.

Өдрийн зээлийн дарамтнаас болж, хоёр ч ээж амиа хорлосон. Цаашид хичнээн ээж амиа хорлохыг харахыг хүлээж байгааг төр засгаас асууж байна.