Өнгөрсөн долоо хоногийн даваа гарагт болсон хүчтэй газар хөдлөлтийн улмаас Турк, Сирид нийтдээ 41 мянга гаруй хүн амиа алдаж, олон мянган барилга байшин сүйдсэн юм. 

Туркийн Кахраманмараш болон Хатай мужид хоёронтаа болсон газар хөдлөлт аймшигт сүйрлийг дагуулсан бөгөөд Хатай мужид энэ байгалийн гамшигт тэсэж үлдсэн цорын ганц хот нь Эрзин байв. Энэ хот бараг л хохирол амсаагүй нь хотын дарга Оккеш Эльмасоглугийн гавьяа гэж Туркийн хэвлэлүүд бичжээ. Туркийн Cumhuriyet хэвлэлийн мэдээлснээр, 42 000 хүн амтай Эрзин бүрэн бүтэн үлдсэний дээр нэг ч хүн амиа алдаагүй аж.  

Эрзин хотын дарга Оккеш Эльмасоглу  нь сөрөг хүчний Ардын Бүгд найрамдах намын төлөөлөгч, өмгөөлөгч нэгэн. Хатай мужийн өмгөөлөгчдийн зөвлөлийн гишүүнээр гурвантаа сонгогдож байжээ. Хотын даргаар сонгогдохоосоо өмнө хотын зөвлөлийн тэргүүн байсан аж.

Cumhuriyet сонины бичсэнээр, Эрзин хот газар хөдлөлтөөр бүрэн бүтэн үлдсэн нь сүүлийн жилүүдэд хотын даргын баримталсан бодлоготой холбоотой гэнэ. Оккеш Эльмасоглу барилга барих зөвшөөрөл олгох тал дээр хатуу байр суурь баримталдаг бөгөөд чанаргүй барилга барьдаг компаниудыг зах зээл дээр үйл ажиллагаа явуулахыг зөвшөөрдөггүй аж.

Тэрбээр сэтгүүлчдэд ярихдаа, барилгын салбарынхны зүгээс түүнд асар их дарамт үзүүлдэг ч үзэл бодлоосоо ухраагүй, гагцхүү бүхий л стандарт, шаардлагыг хангасан нөхцөлд зөвшөөрөл өгнө гэдэгтээ бат зогсдог хэмээжээ. Хамаатан садандаа ч хатуурхдаг тэрбээр төрөл төрөгсдийнх нь нэг нь хууль бусаар барьсан барилгыг буулгах, торгууль оноох шийдвэр гаргаж, энэ шийдвэрээ цуцлаагүй гэнэ. 

Хүчтэй газар хөдлөлт болж, хаа сайгүй байшин барилга нурж, олон мянган хүн амиа алдаж байхад нэг ч хүний хохиролгүй давж гарсан Эрзин хотын даргыг Туркэд баатраар өргөмжилж байгаа бол олон улсын хэвлэлүүд ч түүний талаар ихээхэн мэдээлжээ. 

"Хууль бусаар нэг ч барилга барихыг би зөвшөөрөөгүй. Надад уурлаж, намайг шүүмжилж, сүрдүүлж байсан. Гэсэн ч одоо харахад харамсах зүйл хийгээгүй байна" хэмээн Эльмасоглу хэвлэлийнхэнд ярьсан байна. 

Эльмасоглугийн өгүүлснээр, Эрзин хотод хууль бусаар барьсан болон чанаргүй барьсан барилгууд ч байсан гэнэ. Тиймээс бүгдийг стандартад нийцэж байгаа эсэхийг шалгаж, чанаргүй барилгуудыг буулгах шийдвэр гаргаж байжээ.

"Над дээр хүмүүс ирээд л барилгын зөвшөөрөл өгөхгүй байна гэж гомдол гаргадаг байсан. Би бүгдэд нь "уучлаарай, боломжгүй" л гэж хэлдэг. Тиймээс одоо манай хотод олон хүн надад дургүй" хэмээн Эльмасоглу ярьжээ.

Оккеш Эльмасоглу одоо даргаар нь ажиллаж байгаа хотынхоо уугуул. Тэрбээр 1979 онд Эрзин хотод төрж, эндээ дунд сургуулиа төгсөн, Стамбул руу их сургуульд сурахаар явжээ. Хуульчийн дипломтой болж, цэргийн алба хаасныхаа дараа Эльмасоглу Эрзин хотдоо эргэн ирж, мэргэжлээрээ ажиллах болсон байна. 

Г.Бямбасүрэн