Иргэдийн жагсаал цуглаантай холбогдуулан Засгийн газрын хэрэг эрхлэх газрын дарга Д.Амарбаясгалан, Эдийн засгийн хөгжлийн сайд Ч.Хүрэлбаатар над өнөөдөр /2022.12.05/ мэдээлэл хийлээ.

ЗГХЭГ-ын дарга Д.Амарбаясгалан: Хэдий идэр есын хүйтэн болж байгаа ч ард иргэд маань бухимдлаа илэрхийлж, нийгэм өрнөж буй үйл явдалтай холбогдуулан УИХ, Засгийн газарт шаардлага тавьж байна. Ард иргэд бухимдах нөхцөл үүссэнтэй Засгийн газар санал нэг байна. Эрдэнэтийн 49 хувь, Дарханы төмөрлөгийн үйлдвэрийн концессын гэрээ, Хөтөлийн цемент шохойн үйлдвэрийн хувьчлалын асуудал, Эрдэнэс Тавантолгой болон нүүрсний бизнес тойрсон хулгайтай холбоотой олон асуудал нийгмийг бухимдуулж байна.

Л.Оюун-Эрдэнийн Засгийн газар энэ асуудлуудыг олон нийтэд ил болгох, шийдвэрлэж, хуулийн хариуцлага хүлээлгэхээр шамдан ажиллаж байна. ЦЕГ-ын Эдийн засгийн гэмт хэрэгтэй тэмцэх хэлтэс 2017 оноос Эрдэнэс Тавантолгой ХК-ийн нэг мөргөцөг буюу 385 мянган тонн нүүрс алга болсон асуудлыг шалгаж байгаа.  Эрдэнэс Тавантолгой болон жижиг Тавантолгойн хооронд нүүрсний зөрүү үүссэн асуудлын хариу өнөөдрийг хүртэл гараагүй байна.

Өнөөдрийн байдлаар 15 орчим албан тушаалтнуудыг АТГ-т шалгаж байна. Засгийн газар, яамд, агентлагийн төлөөллүүдийг шалгаж байна. Засгийн газрын гомдлоор нэр бүхий албан тушаалтнууд шалгагдаж байгаа” гэсэн байр суурийг илэрхийлж, асуудлыг яриа хэлэлцээрийн шугамаар шийдвэрлэхийг жагсаал зохион байгуулагчдад хэлэв.

Ерөнхий сайдын захирамжаар жагсаал цуглаан хийж буй иргэдтэй уулзаж, шаардлагыг нь хүлээн авч, хэлэлцэх ажлын хэсгийг байгуулсан байна. Тус ажлын хэсгийг ЗГХЭГ-ын дарга Д.Амарбаясгалан ахалжээ.