"Популярная политика" суваг ажиллуулдаг, Алексей Навальныйг дэмжигчид ихээхэн шуугиан тарьсан дүрс бичлэг цацжээ. Энэ бичлэг дээр Оросын олигархи, "Вагнер" хувийн цэргийн компанийг эзэмшигч, Путиний итгэмжит этгээд гэгддэг Евгений Пригожин Украины дайнд оролцуулахаар хоригдлуудыг ухуулж байгаа нь дүрслэгдэх аж. Бичлэгийг чухам ямар хорих газарт хийсэн нь тодорхойгүй ч Марий Эл дэх №6 засан хүмүүжүүлэх газарт хийсэн бололтой гэж Медуза мэдээлжээ. 

"Би хувийн цэргийн компанийн төлөөлөгч. Та нар Вагнера гэж сонссон л байх. Хүндхэн дайн болж байна. <...> Бид 22-оос дээш насныхныг элсүүлнэ. Ийм насанд хүрээгүй бол ойрын төрөл төрөгсдөөсөө зөвшөөрлийн бичиг авна. Цэрэгт элсэх хүмүүсийн насны босго нь 50. Гэхдээ чадал хүрэхээр бол хамаагүй, яг одоо энд хялбархан тест аваад, шалгачхаж болно. Бие бялдар нэн чухал. Тиймээс ч хэр бие бялдар, эрүүл мэнд сайтайг хамтдаа шалгаад, тэгээд элсүүлж болно" хэмээн Пригожин өгүүлэх аж. 

Түүнчлэн хоригдлуудын дундаас цэрэг элсүүлэхдээ эрүүгийн хариуцлагад татагдсан хэлбэрийг нь харгалзана гэдгийг онцолсон байна. Тухайлбал, "228 дугаар зүйл ангиар шийтгүүлсэн хүмүүст анхааралтай хандана" хэмээжээ. ОХУ-ын Эрүүгийн хуулийн 228 дугаар зүйлд "мансууруулах бодис, сэтгэцэд нөлөөлөх бодис, түүнтэй адилтгах бодисыг хууль бусаар олж авах, хадгалах, тээвэрлэх, бэлтгэх, боловсруулах"-ыг хориглосон байдаг аж. 

"Бид 228-аар сууж байгаа хүмүүст болгоомжтой хандана. Хамааралтай байсан уу үгүй юу гэдгийг шалгана. Полиграфаар хүмүүсийг хэр тэсвэртэй, хэр хамааралтайг шалгана. Түүнчлэн бэлгийн хүчирхийллийн хэргээр сууж байгаа хүмүүст болгоомжтой хандана. Гэхдээ алдаа гарч болдог гэдгийг ойлгоно" хэмээн Пригожин өгүүлжээ. 

Цаашлаад, дайнд явсан тохиолдолд хэрхэн өршөөгдөх, хэрхэн оршуулах талаар ярьсан байна. 

"Би та нарт бүх зүйлийг ярьж өгсний дараа ярилцлага хийнэ. Энэ ярилцлагын үеэр би хэсэгхэн хугацаанд байлцана. Дараа нь хэдэн хүн үлдээд, та нартай нэг бүрчлэн нүүр тулж ярилцан, хэдэн асуулт тавина. Амиа алдвал яах вэ? Та нар гэрээслэлдээ заасан тэр газар руу цогцосыг чинь хүргэнэ. Бүгдийг Баатруудын дурсгалын цогцолборт оршуулна. Хаана гэдгээ мэдэхгүй байгаа хүмүүсийн шарилыг Горячий Ключ дэх Вагнерын сүмийн ойролцоо оршуулна. Цаашлаад. Хагас жилийн дараа та нар ялаас хэлтэрч, өршөөгдөн гэртээ харина. Бидэнтэй хамт үлдэхийг хүссэн хүмүүс хамтдаа үлдэнэ. Тиймээс шорон руу буцна гэж байхгүй. Дайнд очоод эхний өдрөө л "Би буруу газраа иржээ" гэх хүмүүсийг бид "цэргийн албанаас оргон зайлсан" гэж үзээд буудна. <...> Залуус аа, асуух зүйл гарвал асуугаарай. Асуултад хариулсны дараа ярилцлага авна. Шийдвэр гаргах хугацаа таван минут" хэмээн Пригожин өгүүлжээ. 

Энэ бичлэг гарсны дараа Оросын "Русь сидящая" санг үүсгэн байгуулагч, хүний эрхийг хамгаалагч Ольга Романова "Настоящее время" сувагт хоригдлуудыг хэрхэн цэрэгт татаж байгаа, амлалтууд нь хэр бодитой талаар тайлбар өгсөн байна. 

"Хоригдлуудыг өршөөнө гэж амлаж байна. Гэтэл ОХУ-д ялтнуудыг өршөөх эрхтэй цорын ганц хүн нь Ерөнхийлөгч. Кремлин.ру сайт дээр "Өршөөл" гэсэн хэсэг байдаг. Энэ хэсэг рүү ороод харахад хамгийн сүүлд 2021 онд зургаан хүнийг өршөөсөн байна. Пригожин өөрөө ч байлдааны ажиллагаанд орсноос хойш хагас жилийн дараа өршөөнө гэж. Энэ хугацаанд амьд хүн үлдэхгүй л болов уу.  Учир нь үхлийн гол шалтгаан нь мина дэлбэрэх явдал гэж амиа алдагсдын ар гэр бидэнд мэдээлж байгаа. Вагнерчууд ч иймэрхүү зүйл ярьж байгаа. Цэргүүдэд хоёр гранат өгнө, бүслэлтэд орвол өөрийгөө дэлбэлнэ" хэмээн Ольга Романова өгүүлжээ.

Түүний өгүүлснээр, ОХУ 10 мянга орчим хоригдлыг дайнд оролцуулахаар хорихоос гаргасан гэнэ. Цаашдаа ч хоригдлуудыг ухуулж, цэрэгт татах ажиллагаа улам өргөжинө гэж үзэж байгаагаа Ольга Романова илэрхийлжээ.

Г.Бямбасүрэн