Өвлийн өвгөн Великий Устюг дахь үлгэрийн ордноосоо оросуудад хандан ирж буй шинэ оны мэнд дэвшүүлсэн талаар АиФ мэдээлжээ. 

Шинэ жилийн шидтэний мэндчилгээ бүхий дүрс бичлэгийг "ВКонтакте" олон нийтийн сүлжээн дэх Өвлийн өвгөний хуудсанд нийтэлсэн байна. Тэрбээр мэндчилгээндээ бүх хүнд аз жаргал, эрүүл мэнд, үнэнч нөхөдтэй байхыг ерөөжээ. Түүнчлэн "хүн бүр сайн үйлээрээ дэлхийг чимэх" чадвартай гэдгээ мартахгүй байхыг уриалсан байна. 

"Шинэ он танд хүч чадал, гайхамшгийг авчирж, нандин хүслийг тань биелүүлэх болтугай. Мөрөөдцгөө, мөрөөдлөө биелүүл. Зорилгодоо хүрэхийн тулд итгэл төгс алх" хэмээн Өвлийн өвгөн өгүүлсэн байна.

Энд дуулгахад, Оросын Великий Устюг дахь Өвлийн өвгөний ордон шинэ жилийн баярын өдрүүдээр жуулчдын хөлд дарагддаг, аялал жуулчлалын гол төвүүдийн нэг юм. Харин энэ жил коронавирусийн цар тахлын улмаас хүүхдүүдийн аялал хүлээж авахгүй, харин насанд хүрэгчид бүрэн тунд хамрагдаж, QR кодтой бол Өвлийн өвгөнийхөөр зочилж болох гэнэ. 

Г.Бямбасүрэн