Оросын Ирээдүйтэй судалгааны сан зургаан хүн тээвэрлэх чадвартай "Циклокар" автомашин бүтээх ажлыг эхлүүлсэн талаар "Комсомольская правда" мэдээлжээ. 

Энэ нь нисдэг машин байх бөгөөд машины анхны загварын эхний нислэгийг 2022 онд хийнэ гэж тооцоолсон байна. Машин 600 кг ачаа буюу зургаан хүн тээвэрлэх чадалтай байх аж. Нисдэг машиныг "Циклон" төслийн хүрээнд бүтээж байгаа юм байна. Одоогийн байдлаар нисдэг машины урьдчилсан төслийг гаргаж, мөчлөгт хөдөлгүүрийн газар дээгүүрх туршилтыг хийжээ.

"Энэ машины онцлог шинж нь дуу чимээ бага, зүтгүүрийн чиглүүлэгчийг 360 хэмээр хурдан удирдах боломжтой, налуу гадаргуу дээр газардах боломжтой. Мөчлөгт хөдөлгүүрүүдийн тусламжтайгаар "Циклокар" агаарт тогтон, хөдөлнө" хэмээн төслийн ахлагч Янвек Чибисов өгүүлжээ.

Түүний өгүүлснээр, нисдэг машиныг жолоодоход хүндрэлгүй, бүхээгнээсээ болон ухаалаг төхөөрөмж эсвэл газар дээрх удирдлагын цэгээс удирдах боломжтой байхаар төлөвлөж байгаа аж.

Г.Бямбасүрэн