АНУ-ын Миннеаполис хотод өнгөт арьст эр цагдаагийнханд баривчлагдах үеэрээ амиа алдсанаас үүдэлтэй эсэргүүцлийн хөдөлгөөн улс орон даяар өрнөж, Америкт хаа сайгүй эмх замбараагүй байдал дэгджээ. 

АНУ: Амь нэхсэн жагсаалд өөр нэг амь хохиров

NBC агентлагийн мэдээлснээр, АНУ-ын нийслэл Вашингтон хотод олныг хамарсан эмх замбараагүй байдал үүссэний улмаас хотын дарга Боузер хотод хөл хорих цаг тогтоожээ. Энэ нь тавдугаар сарын 31-ний 23 цагаас зургадугаар сарын нэгний даваа гаригийн өглөөний 06 цаг хүртэл үргэлжлэх юм (Улаанбаатарын цагаар зургаадугаар сарын нэгний 18.00 цаг хүртэл).

Түүнчлэн хотод эмх журам сахиулахаар Колумбийн тойргийн Үндэсний гвардыг дайчилсан бөгөөд гвардынхан нийслэлийн цагдаагийнханд дэмжлэг үзүүлж ажиллана гэж Риа Новости мэдээлжээ. Энэ хотод эмх замбараагүй байдлын дараа 17 хүнийг баривчилсан, мөн мөргөлдөөнийн үеэр 11 цагдаа гэмтэж бэртсэн байна. 

АНУ-ын Лос-Анжелес, Сан-Франциско, Беверли-Хиллз, Чикаго, Орландо, Атланту, Денвер, Баруун Холливуд зэрэг  нийтдээ 40 гаруй хотод хөл хорих цаг тогтоосон бол Аризона муж даяар иргэдийн зорчих хөдөлгөөнийг хязгаарлажээ.

Хохирогчдын тоо нэмэгдсээр 

АНУ даяар өрнөсөн эмх замбараагүй байдлын давалгаа Миннеаполис хотод нэгэн цагдаа баривчилгааны үеэр санамсаргүй байдлаар өнгөт арьст эр Жорж Флойдын амийг хөнөөснөөс үүдэлтэй юм. Энэ хэрэг өнгөрсөн даваа гаригт гарсан бөгөөд Миннеаполис хотод өнөө хэр эсэргүүцэл намжихгүй байна. 

Харин Индианаполис болон Оклэнд хотод эмх замбараагүй байдлын үеэр жагсагчид цагдаагийнхантай мөргөлдсөний улмаас Холбооны хамгаалалтын албаны нэг алба хаагч амиа алджээ. Эрх баригчид шархадсан, гэмтэж бэртсэн хүмүүсийн тоог гаргаж байгаа гэнэ. ВВС агентлагийн мэдээлснээр жагсагчид болон цагдаагийнхан аль аль нь ноцтой гэмтэл бэртэл авах тохиолдол нэмэгдсээр байгаа аж. 

Зөвхөн Филадельфи хотод гэхэд л 12 цагдаагийн алба хаагч гэмтэж бэртсэн байна. Хөл хорих цаг тогтоосон хотуудад үндэсний гвардынхан ажиллаж байгаа ч уурлаж, улангассан иргэдийг зогсооход нулимс асгаруулагч хий, гэрэлт, дуут гранат ч нэмэр болохгүйй байгаа гэнэ.

Нью-Йорк хотод гэхэд л цагдаагийнхан жагсагчдыг тогтоон барьж дийлэлгүй, машинаа шатаалган, хэдэнтээ мөргөлджээ. Одоогийн байдлаар 1700 гаруй хүн АНУ-ын хотуудад баривчлагдсан байна.

Трамп нуугджээ

Тавдугаар сарын 29-нөөс 30-нд шилжих шөнө Цагаан ордны гадаа эмх замбараагүй байдал эхэлсний улмаас АНУ-ын Ерөнхийлөгч Дональд Трамп газар доорх бункерт нуугдсан талаар The New York Times мэдээлжээ.

Энэ талаар АНУ-ын Ерөнхийлөгчийн хамгаалалтыг хариуцдаг Нууц албаны ажилтнууд баталсан байна. Гэхдээ Трамп газар доорх хоргодох байранд нэг цагаас илүү байгаагүй гэж CNN суваг мэдээлжээ. 

АНУ: Өнгөт арьстан VS цагаан арьст цагдаа буюу Фергюсоны хэрэг давтагдах уу?

Г.Бямбасүрэн