АНУ-ын Ерөнхийлөгч Дональд Трамп ирэх онд дахин сонгогдохын тулд гол өрсөлдөгч болох Жозеф Байденыг "замаасаа зайлуулахын тулд" Украины Ерөнхийлөгч Владимир Зеленскийтэй утсаар ярих үеэрээ өөрт нь туслахыг шахсан гэсэн шуугиан Трампыг огцруулж ч мэдэх нөхцлийг үүсгэсэн юм.
Харин үнэхээр Трамп Зеленскийтэй ярих үедээ түүнийг "дарамталсан" эсэх талаар "Россия 24" сувгийн сэтгүүлч Валентин Богданов Зеленскийгээс тодруулжээ.
Тэрбээр энэ асуултанд " Би тусгаар улсын ерөнхийлөгч учраас хэн ч намайг дарамталж чадахгүй. Одоо зургаан настай хүү минь л намайг "дарамталж" чадна" хэмээн хариулсан байна.
Эргэн сануулахад, АНУ-ын Конгрессын Төлөөлөгчдийн танхимын дарга Нэнси Пелоси Трампын импичментийг зарлах ажиллагаа эхлүүлсэн хэмээн мэдэгдсэн. Энэ нь Трамп, Зеленский нарын утасны яриатай холбоотой бөгөөд ийнхүү утсаар ярихдаа ирэх онд Ерөнхийлөгчийн сонгуульд нэр дэвших Жозеф Байдены хүүгийн эсрэг Украинд хэрэг мөрдөлт эхлүүлэхийг Зеленскийгээс шахаж шаардсан гэсэн мэдээлэл Америкт ихээхэн шуугиан тариад байгаа юм. Жозеф Байдены хүү Хантер Байден Украины Burisma Group хийн компанийн захирлуудын зөвлөлийн гишүүн байсан аж.
Г.Бямбасүрэн
| Уншиж байна |