Якутын бөө  Александр Габышев 2021 онд Москвад хүрч, “Владимир Путиныг хөөхийн тулд” Алс Дорнодын зам дагуу 4 сарын турш алхаж байга талаар sibreal.org мэдээллээ. 

Якутын бөө Оросын Ерөнхийлөгчийг гагцхүү бөөгийн хүчээр л дарагдах хар хүчтэй хэмээн үзэж байгаа гэнэ. Хоёр мянга орчим километр замыг явган туулахдаа тэрбээр олон зуун жолоочтой яриа өрнүүлж, түүнтэй хийсэн дүрс бичлэг Юүтүб хуудаснаа ихээхэн хандалттай байдаг бол Чита хотын сөрөг хүчнийхэн түүнийг угтан уулзалт-жагсаал хийхээр төлөвлөж байгаа аж. 

Александр Габышев “Якутия 14” гэсэн гар хийцийн дугаартай жижиг түрдэг тэрэг чирж явах бөгөөд энэ тэргэндээ эвхэгддэг гэр, зуух, хувцас, хүнс гээд өөрт хэрэгтээ бүхнээ ачжээ. 
Хэдийгээр хөнгөн цагаанаар хийсэн ч ачаатай тэрэг 100кг татдаг гэж аялагч “Сибирь.Реалия” –ийн сэтгүүлчид ярьсан байна. 

Өдгөө 51 настай тэрбээр дээд боловсролтой, Якутын улсын их сургуулийн түүхийн факультет төгссөн ч мэргэжлээрээ ажиллаж байгаагүй, гагнуурчин, манаач зэрэг ажил хийдэг байсан гэнэ. 

Түүнийг алхаж явах үед зам зуур хүмүүс ихээр сонирхож, зогсон зургаа авахуулж яриа өрнүүлдэг тул алхах хурд саардаг хэмээн Александр өгүүлсэн байна. 

“Хуваарийн дагуу өдөрт дор хаяж 20 км зам туулах ёстой. Гэвч ийм завсарлага авснаас болж хуваарьт зайгаа туулахгүй байх нь элбэг. Ард түмэн хайрлаж, яриа өрнүүлж байхад яалтай  ” хэмээн Александр ярьжээ. 

Түүний өгүүлснээр, гуравдугаар сард Якутскаас халаасандаа 3000 рубльтэй (монгол мөнгөөр 120 гаруй мянган төгрөг) гарч, 40 хэмийн хүйтэнд өвлийн гэрт хоноглох үед нь хүмүүс олноор тусалж, мөнгө, хоол хүнс, хоноглох газар олж өгдөг болсон гэнэ. 

Путин л явчихвал  бүх зүйл сайнаар эргэнэ гэж бодож байгаа эсэх талаарх сэтгүүлчийн асуултанд тэрбээр “Путин явчихвал миний хувьд ялалт. Хамгийн гол нь чөтгөрийг ялах нь чухал, харин хүмүүс өөр хоорондоо учраа олно.Илүү хүчтэй хүмүүс олдоно. Жириновский, Зюганов, Навальный ч юм уу гараг л дээ. Хамгийн гол нь тэд бол хүмүүс. Төрийн эрхэнд гараг, харин ард түмэн хэнийг сонгохоо шийднэ” хэмээн хариулжээ. 

Тэрбээр "ардчилал бол айдасгүй байхыг хэлнэ. Харин одоо хүмүүс ярихаас, ажлаас нь халж, цалинг нь хасахаас айж байна. Ердөө л манайд хил хязгааргүй чөтгөрийн хүч оршиж байгаа юм. Ард түмнийг зохиомол депресст оруулсан. Үүнийг гагцхүү ид шид л дарна. Над шиг цагааны хүчний шидтэн үүнийг зайлуулна"  хэмээн мөн ярьсан байна.

Г.Бямбасүрэн