НИТХ-ын дарга Ц.Сандуйг огцруулах асуудал ид яригдаж байна. МАН-ын Удирдах зөвлөлийн хуралдаанаар түүнийг огцруулах асуудлыг яриагүй учраас НИТХ дахь МАН-ын төлөөлөгчид огцруулах саналыг хүргүүлсэн. Мөн НИТХ дахь АН-ын бүлгийн төлөөлөгчид ч энэ саналыг дэмжиж буйгаа өнөөдөр илэрхийлсэн. Ингэснээр НИТХ-ын 45 төлөөлөгчийн 27 нь Ц.Сандуйг огцруулах саналтай байна. Эл асуудлаар өнөөдөр НИТХ дахь МАН-ын бүлгийн дарга С.Мөнхчулуун, төлөөлөгч П.Баярхүү мэдээлэл хийлээ.

С.Мөнхчулуун “МАН-ын бүлэг 34 төлөөлөгчтэй. Тэдний 16 нь НИТХ-ын даргыг огцруулах бичигт гарын үсэг зурсан. Энэ бол олонх болоогүй гэсэн үг. АН-ын 11 төлөөлөгчтэй нийлээд 27 болсон ч Засаг захиргаа,нутаг дэвсгэрийн нэгж, түүний удирдлагын тухай хуульд заасан Иргэдийн хурлын ээлжит бус хурлыг хуралдуулах хэмжээнд хүрээгүй.

Огцруулах бичигт гарын үсэг зураагүй төлөөлөгчдийг 60 тэрбумын асуудлыг хамгаалж байна гэсэн мэдээлэл нь ор үндэсгүй. Нийслэлийн МАН хуралдаж, ямар нэг шийдвэр гаргаагүй. МАН-ын бага, их хурал 20 хоногийн дараа болно. Гэтэл үүний наана ингэж улстөржиж, намыг хагалан бутаргах, төрийн ажлыг цалгардуулж байна” гэсэн байр суурийг илэрхийлэв.

Мөн тэрбээр “Засаг захиргаа,нутаг дэвсгэрийн нэгж, түүний удирдлагын тухай хуулинд ИТХ-ын даргыг гарын үсэг цуглуулж, огцруулна гэсэн заалт байхгүй. Нийт төлөөлөгчдийн 2/3-оос дээш хүн нь гарын үсэг зурсан бол ээлжит хурлыг хуралдуулна. 2/3-оос дээш хүн санал гаргасан бол хурал өөрөө тарна гэсэн заалт бий. Гарын үсэг цуглуулаад огцруулах боломжгүй гэдгийг мэдсээр байж улс төрийн зорилготой ажиллаж байгаа нь буруу” гэв.

Иргэдийн хурлын дүрэм болоод хууль тогтоомжид ИТХ-ын даргыг огцруулах заалт байдаггүй аж. Харин гэм буруутай нь шүүхээр тогтоогдвол намын дүрмийн дагуу ёсзүйн хариуцлагын асуудал яригдах юм байна. “Өнөөдрийг хүртэл ИТХ-ын даргыг огцруулж байсан тохиолдол байхгүй. Учир нь хуулинд заагаагүй. Зөвхөн өөрийн хүсэлтээр чөлөөлөгдөж болно” гэдгийг МАН-ын бүлгийн дарга С.Мөнхчулуун нэмж хэллээ.

В.Бат